O vindeiro xoves 18 de decembro de 2025, ás 19 h, terá lugar a presentación do libro Poemas desencadenados de Áurea Sánchez, no Salón de Actos da Facultade de Filosofía (Mazarelos, Santiago).
Este libro aborda a ausencia do amor cun ton íntimo e directo. A través de versos sinxelos e musicais, a autora fala do cotián desde a experiencia persoal e a sinceridade. O poemario percorre o desamor, o recordo e o regreso, na procura dunha harmonía construída co ritmo das palabras e coa emoción verdadeira.
Áurea Sánchez, nada en Sobrado (A Coruña), en 1956. É licenciada en Ciencias da Información e doutora en Xornalismo pola Universidade Complutense de Madrid.
Traballou en prensa, radio e televisión e colabora ocasionalmente con Diario Siglo XXI. Así mesmo, publica artigos de opinión no seu blog Noticia del Día, que superou as 26.000 visitas rexistradas.
É autora de Las Marías de Santiago (Libros.com, 2017), Destino… Cancún (Meubook, 2013 e Amazon, 2023) e La vida en mil pedazos (Amazon, 2016 e 2024).
O acto contará coa participación de Rosalía Morlán, poeta de Santiago, que presentará o libro, e de Nazaret López, xornalista e escritora, que presentará á autora. A velada completarase cunha intervención musical a cargo de Haruna Takebe, piano, e Cibrán García, violín.
A pianista xaponesa Haruna Takebe formouse na Universidade Toho Gakuen de Tokio, ampliou estudos en Berlín e obtivo o máster en Amsterdam. Actuou como solista con importantes orquestras e desenvolve unha ampla traxectoria en recital e música de cámara. Actualmente reside en Santiago de Compostela e colabora coa Escola de Altos Estudos Musicais.
Cibrán García, nado en Santiago de Compostela en 2009, iniciou os estudos de violín aos 4 anos. Rematou o grao profesional en 2025 e foi recoñecido con diversos premios en concursos nacionais e internacionais de corda.
Un encontro para gozar da poesía e da música nun ambiente próximo e coidado. 📚🎶
