No marco do Máster en Matemática Industrial (M2i), o secretario de Alumni USC, Víctor García Dopico, impartiu unha clase práctica sobre os procedementos legais necesarios para crear unha empresa. O M2i é unha titulación que coordina a Universidade de Santiago de Compostela (USC) e na que participan tamén as universidades da Coruña (UDC), de Vigo (UVigo), Carlos III de Madrid (UC3M) e Politécnica de Madrid (UPM).
A sesión tivo como obxectivo achegar o alumnado á realidade dos trámites xurídicos e administrativos que implica a posta en marcha dunha actividade empresarial. García Dopico ofreceu unha visión práctica dos pasos que cómpre seguir para constituír unha empresa e deu a coñecer as principais obrigas legais asociadas ao seu funcionamento.
Esta actividade formativa permitiu complementar os coñecementos científicos e tecnolóxicos do alumnado cunha aproximación ao ámbito xurídico e empresarial. Esta perspectiva resulta especialmente relevante para os estudantes que, ao remataren a súa formación, desexen desenvolver proxectos propios, impulsar iniciativas emprendedoras ou asumir responsabilidades profesionais en contornas industriais e tecnolóxicas.
O Máster en Matemática Industrial ten como finalidade proporcionar unha formación sólida e aplicada que facilite a incorporación das persoas tituladas á industria, así como o desenvolvemento dunha carreira profesional con niveis crecentes de responsabilidade. Para iso, o programa combina o reforzo das capacidades analíticas, a adquisición de competencias específicas no deseño e no manexo de software industrial e a iniciación do alumnado na investigación e no desenvolvemento.
A participación do secretario de Alumni USC nesta iniciativa enmárcase no compromiso da asociación coa formación integral do estudantado universitario e coa conexión entre o coñecemento académico e as necesidades reais do mundo profesional. Mediante este tipo de colaboracións, Alumni USC contribúe a proporcionar ao alumnado ferramentas e coñecementos prácticos que poden ser útiles no seu futuro laboral e no desenvolvemento de novas iniciativas empresariais.
