Santiago, outubro 2026: O secretario de Alumni USC, Víctor García Dopico, impartiu unha clase práctica sobre os procedementos legais necesarios para crear unha empresa no marco do Máster en Matemática Industrial (M2i), unha titulación coordinada pola Universidade de Santiago de Compostela (USC) e na que participan tamén as universidades da Coruña (UDC), Vigo (UVigo), Carlos III de Madrid (UC3M) e Politécnica de Madrid (UPM).
A sesión tivo como obxectivo achegar o alumnado á realidade dos trámites xurídicos e administrativos que implica a posta en marcha dunha actividade empresarial, ofrecendo unha visión práctica dos pasos que cómpre seguir para constituír unha empresa e coñecer as principais obrigas legais asociadas ao seu funcionamento.
Esta actividade formativa permitiu complementar os coñecementos científicos e tecnolóxicos do alumnado cunha aproximación ao ámbito xurídico e empresarial, especialmente relevante para aqueles estudantes que, ao rematar a súa formación, desexen desenvolver proxectos propios, impulsar iniciativas emprendedoras ou asumir responsabilidades profesionais en contornas industriais e tecnolóxicas.
O Máster en Matemática Industrial ten como finalidade proporcionar unha formación sólida e aplicada que facilite a incorporación dos seus titulados ao ámbito industrial, así como o desenvolvemento dunha carreira profesional con niveis crecentes de responsabilidade. Para iso, o programa combina o reforzo das capacidades analíticas, a adquisición de competencias específicas no deseño e manexo de software industrial e a introdución do alumnado en materias de investigación e desenvolvemento.
A participación do secretario de Alumni USC nesta iniciativa enmárcase no compromiso da asociación coa formación integral dos universitarios e coa conexión entre o coñecemento académico e as necesidades reais do ámbito profesional. A través deste tipo de colaboracións, Alumni USC contribúe a achegar ao alumnado ferramentas e coñecementos prácticos que poden resultar de utilidade no seu futuro laboral e no desenvolvemento de novas iniciativas empresariais.
