Santiago, (09/07/26) O xornalista, escritor e pintor Jacinto Ruiz Valentín presentou este xoves na Facultade de Filosofía da Universidade de Santiago de Compostela, nun acto organizado baixo o acubillo de Alumni USC, a súa nova novela, “El hijo de la roca y del fuego” (Teima Literaria, 2026), unha obra que nos traslada corenta mil anos atrás para ofrecer unha mirada distinta sobre a desaparición dos neanderthais e a chegada do Homo sapiens.
Partindo da investigación e da ficción, o autor propón unha reflexión sobre unha idea central da novela: os neanderthais non eran seres tan diferentes de nós. Pensaban, amaban, sufrían, sentían medo, coidaban das súas familias, enterraban os seus mortos e expresábanse a través da arte. En boa medida, o que hoxe somos tamén llo debemos a eles.
A través da historia de Fog, un neanderthal, e Mila, unha muller sapiens, Ruiz Valentín recrea a convivencia entre ambas especies e reivindica tamén o papel das mulleres como protagonistas activas da vida daqueles grupos humanos, máis alá dos tópicos que durante séculos marcaron o relato da prehistoria.
Na presentación, o xornalista Carlos Carballo destacou que El hijo de la roca y del fuego “invítanos a reflexionar sobre as nosas orixes” e lembrou que, en realidade, a novela “fala de nós mesmos”. Unha mirada ao pasado coa que Jacinto Ruiz Valentín formula tamén preguntas sobre o presente e sobre a condición humana.
